हामा जैड समाजत जनम लिछि, उड समाजेर भाषा, संस्कृति आर परम्परा ला हामार जान आर पहिचानेर सङे गहिरा रुपत जुराल छे । उला हामार प्राण हए , हामाक एक दस्रार सङे बान्भार माध्यम हए । लेकिन आधुनिकतार नामत हामा एैला अमुल सम्पदा ला से दुर हत्ते चलि जाचि । ताते आजकार जरुरत छे हामा  अप्नार भाषा, संस्कृति आर समाजेर रक्षा आर बिकासत अप्नार योगदान दिबार । इर सहि बेला भि छे , सभाय मिलिए तलकार बुदा ला अप्नार जिबनत अप्निबा सकिले जरूर एक दिन हामार समाजेर बिकास हबे ।

१. भाषा जोगाबार बादे  प्रयोग
– अप्नार माऐर भाषा बल्बार, लेखबार आर परभार प्रोत्सान करबा लागे ।
– घरत छुवा लार सङे अप्नार माऐर भाषार पर गफ करबा लागे ।
– अप्नार भाषा ( माऐर भाषा ) पर कबिता, किस्सा, लोक गान लेखबार आर सुनाबार अभ्यास करबा लागे ।
– स्कुल आर समाजेर संस्था लात माऐर भाषार कक्षा यानी कि कार्यक्रम चलावा लागे ।

२. संस्कृति आर परम्परार बिकास
– भाषा, पबनी आर परम्परार बचाव करिए नाया पुस्ता लाक सिकावा लागे ।
– नाचगान, पहेना ला,खानपान, लोक कला आर हस्तकलार जैसा संस्कृतिर विकास करबा लागे ।
– अप्नार संस्कृतिर कार्यक्रम ला डिजिटल प्लेटफर्मत जैनङ फेसबुक, युट्युव त देखाबार बेबस्था करबा लागे ।

३. समाज सेवा आर बिकास
– गाँव समाजरत शिक्षार स्तर सुध्रिबार ताने निसुल्क कक्षा, किताब आर तालिमेर कारिक्रम ला चलाबा लागे ।
– सरसफाइ, स्वास्थ्य आर बाताबरणेर क्षेत्रत चेतना फैलिबा लागे ।
– छुवा पुता, तिरमाती, बुर्हा बुर्ही आर कमजोर लोकेर हितत काम करिबा लागे ।

४. गाभुर लार भुमिका
– गाभुर लाक नेतृत्वदायी कामत सहभागी करिबा लागे ।
– सामाजिक संजालत आर प्रविधीर प्रयोग से सहि ढङ से आप्नार संस्कृति फैलिबा लागे ।
– भाषा आर संस्कृति बचाबार लघु फिलिम, ब्लग, गित आर पोस्टर बेनाबार कामत लाग्बा लागे ।

निचोर
भाषा, संस्कृति आर समाजेर बिकासत केवल सरकार आर कुन्हु संस्थार काम मात्रे नि हए । इर हामार आप्नारे जिमेबारी भि हए । सभाय हामा अप्नार ठाउँ से छट छट काम ला करिले बड परिवर्तन सम्भब छे । आस , हामा सभाय मिलि अप्नार पहिचान बचाबा आर उज्बल भबिसेर निर्मान करबार रस्तात लागी ।