हालुवार गान

                                                         ✍️ ईशान कोच

माटीर छुवाला माटीते पुसा जलम वरदानी
माटीर खाया माटीते खेला करम सनातनी ॥१

आखारी झरी खित्तात पानी जुतुवा छे साकाले
काङ्हेर छाज्जा हाल जङ्गाली हालुवार कदाले ॥२

झुलफुल भोरे मुरगार डाके निदसे जागु ते
मलमल खेते पुगुवा गे लागे सुरुज आगुते ॥३

चारहती छाज्जा लागनी गाउन हालुवार गालाते
पान्तात माजा आलुर साना एहिड बेलाते ॥४

आलीधुर बान्धे रपार काद चाँसला लागाउँ
मारमार करे बिजन छिट्या पाहिँला उठाऊ ॥५

काखर माछे मारिम हौंसे होलीअ खित्ताते
हाँसी खुसि हालुवार सभाङ कादरे छिट्टाते ॥६

अघानी शिशे धानेर मल्ला खुसहालीर आरह गीत
‘खाटरामा सोरो’ साँझे-बात्ती राजवंशी हामार रीत ॥७

जाँहार बहे आङसे थपा पसिना महकेचे
सनार भित्तर मोतीसा दाना चाउले भरेचे ॥८
“शेष”